Kenscoff ap antere moun li yo: èske yon Leta « debout » mezire ak pawòl oswa ak rezilta?

Apre nouvo atak gang ame nan Kenscoff, AlainShow mande si yon Leta « debout » mezire ak deklarasyon oswa ak rezilta konkrè pou pwoteje popilasyon an.

ALAINSHOW | ANALIZ Kenscoff reveye anba doulè ankò. Nan nuit 23 pou rive 24 out 2026 la, yon nouvo atak gang ame frape komin nan. Premye enfòmasyon ki soti nan sous entènasyonal serye yo pale de omwen 30 moun ki mouri, pandan otorite lokal yo fè konnen bilan final la poko fasil pou etabli. Kay boule. Fanmi pèdi pwòch yo. Sitwayen oblije kouri kite lakay yo. Yon legliz ak plizyè rezidans te vize tou. Apre trajedi a, gouvènman ayisyen an anonse ranfòsman fòs sekirite yo, mete yo an eta alèt maksimòm epi pwomèt retabli otorite Leta sou Kenscoff. Men se yon fraz nan kominike a ki atire anpil atansyon: « Le Gouvernement est debout. Il ne se retire pas, il ne transige pas, il ne recule pas. » AlainShow poze yon kestyon senp: Kisa sa vle di pou yon gouvènman rete “debout” lè popilasyon an kontinye ap tonbe? Pwoblèm nan pa sèlman konnen si Leta reyaji apre yon masak. Kesyon fondamantal la se konnen si Leta kapab prevwa, anpeche epi kraze kapasite gwoup ame yo anvan yo fè masak. Sa enpòtan anpil paske Kenscoff pa fèk ap viv trajedi sa yo. Nan mwa jiyè 2026 la, yon rapò Nasyonzini te deja fè konnen omwen 61 moun, ladan yo 14 timoun, te pèdi lavi yo nan yon seri atak nan Kenscoff ak Pétion-Ville ant 4 ak 9 jiyè. Kidonk, apre chak nouvo atak, sitwayen yo gen dwa mande: Ki rezilta konkrè operasyon sekirite ki te anonse deja yo bay? Konbyen chèf gang ki arete? Konbyen rezo ki demantle? Ki zòn Leta reprann definitivman? Ki dispozitif prevansyon ki te mete an plas apre masak anvan yo? Epi, sitou, ki moun ki rann kont lè sistèm sekirite a echwe? Gen yon lòt kestyon peyi a pap kapab evite: eleksyon. Si Leta pa kapab garanti sekirite sitwayen nan plizyè zòn, kijan li pral garanti sekirite kandida, elektè, biwo vòt, materyèl elektoral ak moun k ap travay nan eleksyon yo? Sa pa vle di Ayiti pa bezwen eleksyon. Okontrè, peyi a bezwen retounen nan yon lòd demokratik ak enstitisyon lejitim. Men yon eleksyon pa dwe sèlman gen yon dat sou kalandriye. Li dwe genyen kondisyon minimòm pou sitwayen kapab vote san zam sou tèt yo. Se poutèt sa AlainShow kwè kestyon an pa dwe rete: “Kilè eleksyon ap fèt?” Nou dwe mande tou: “Nan ki kondisyon eleksyon sa yo ap fèt, epi kiyès ki pral kapab vote?” Gouvènman an di li “debout.” Kounye a, se pa lòt deklarasyon popilasyon an bezwen. Se rezilta. Paske sekirite pa yon favè Leta fè sitwayen yo. Se youn nan premye obligasyon Leta. Kenscoff pa dwe tounen yon lòt non nou mete sou lis masak yo, fè twa jou ap pale de li, epi bliye jouk pwochen trajedi a. ALAINSHOW Kesyon yo dwe poze. Responsablite yo dwe egzije.

Kenscoff ap antere moun li yo: èske yon Leta « debout » mezire ak pawòl oswa ak rezilta?

Kòmantè