Èske gen yon nouvo lis politisyen ayisyen ONU sanksyone vrèman avan eleksyon 13 desanm 2026 la?

Apre verifikasyon nan dokiman ofisyèl Konsèy Sekirite Nasyonzini an, AlainShow pa jwenn okenn prèv ki montre ONU pibliye yon nouvo lis politisyen ayisyen pandan semèn sa a.

Depi kèk jou, plizyè mesaj ak lis non ap sikile sou rezo sosyal yo, kote moun ap fè konnen Nasyonzini ta pibliye yon nouvo lis politisyen ayisyen ki anba sanksyon. Apre verifikasyon nan dokiman ofisyèl Konsèy Sekirite Nasyonzini an, AlainShow pa jwenn okenn prèv ki montre ONU mete deyò yon nouvo lis politisyen ayisyen pandan semèn sa a. Se vre, lis jeneral sanksyon Konsèy Sekirite Nasyonzini an te resevwa yon mizajou 4 septanm 2026. Sepandan, chanjman sa a pa t konsène Ayiti. Li te gen rapò ak de dosye ki sou lis sanksyon kont Daech ak Al-Qaida. Dènye fwa ONU te ajoute nouvo non sou lis sanksyon ki konsène Ayiti se te 17 oktòb 2025. De moun ki te ajoute nan dat sa a se Dimitri Hérard, ansyen responsab sekirite Palè Nasyonal, ak Kempes Sanon. Lis ofisyèl sanksyon ONU pou Ayiti genyen nèf moun: - Jimmy Chérizier - André Johnson - Renel Destina, alyas « Ti Lapli » - Wilson Joseph, alyas « Lanmò San Jou » - Vitel'Homme Innocent - Prophane Victor, ansyen depite - Luckson Élan - Dimitri Hérard - Kempes Sanon Genyen tou de gwoup ame ki sou lis la: - Gran Grif - Viv Ansanm Sanksyon sa yo kapab gen ladan entèdiksyon pou vwayaje, jele byen ak resous finansye, ansanm ak restriksyon ki gen rapò ak zam. Li enpòtan pou nou presize majorite moun ki sou lis ofisyèl la se chèf oswa manm gwoup ame. Se pa yon lis ki fèt sèlman ak politisyen. Se poutèt sa li pa kòrèk pou prezante tout non sa yo kòm « politisyen ayisyen ONU sanksyone ». Gen lòt lis sanksyon Kanada ak Etazini te pibliye nan ane ki pase yo ki genyen non ansyen premye minis, senatè, depite, minis, politisyen ak biznisman ayisyen. Men, lis sa yo pa otomatikman menm ak lis Konsèy Sekirite Nasyonzini an. AlainShow mande piblik la pran anpil prekosyon ak dokiman ki pa genyen dat, nimewo rezolisyon, lyen ofisyèl oswa siyati yon enstitisyon ki kapab verifye. Yon lis moun ekspè ta rekòmande pou sanksyone pa vle di moun sa yo deja anba sanksyon. Se sèlman apre Konsèy Sekirite a oswa komite ki responsab dosye a fin apwouve non yo, yo kapab konsidere moun sa yo kòm moun ONU sanksyone. Jiska moman AlainShow ap pibliye verifikasyon sa a, pa gen okenn nouvo lis politisyen ayisyen Nasyonzini anonse kòm moun ki sanksyone pandan semèn nan. AlainShow ap kontinye verifye enfòmasyon yo anvan piblikasyon, pou evite akizasyon san prèv, konfizyon ak difizyon fo nouvèl. Sous: Lis ofisyèl sanksyon Konsèy Sekirite Nasyonzini an ak Komite 2653 sou Ayiti.

Èske gen yon nouvo lis politisyen ayisyen ONU sanksyone vrèman avan eleksyon 13 desanm 2026 la?

Kòmantè