Sekirite ak eleksyon: Berg P. Hyacinthe ap poze kestyon sou kapasite Leta Ayisyen

Nan yon mesaj kout ki itilize imaj ak ekspresyon popilè, Berg P. Hyacinthe mande pouvwa tranzisyonèl la bay rezilta sou de gwo misyon li yo: retabli sekirite epi mennen peyi a nan eleksyon.

Nan yon mesaj kout ki itilize imaj ak ekspresyon popilè, Berg P. Hyacinthe soulve kestyon sou rapò ki genyen ant sekirite, eleksyon ak responsabilite pouvwa tranzisyonèl la: > « Si w pa ka debloke Matisan, ou pa ka òganize eleksyon nonplis. Si w pa ka òganize eleksyon, ou pa ka rete sou pouvwa a pirèd. Pare kou pa pare, antèman an pou katrè. » Pawòl sa yo pa oblije vle di profesè Berg P. Hyacinthe kanpe kòm yon advèsè pèsonèl Premye Minis Alix Didier Fils-Aimé. Yo kapab konprann pito kòm yon entèpelasyon politik ki mande pouvwa a bay rezilta sou de gwo misyon li genyen yo: retabli sekirite epi mennen peyi a nan eleksyon. ## Matisan kòm senbòl feblès Leta Nan deklarasyon an, Matisan pa reprezante sèlman yon katye. Li sèvi kòm senbòl difikilte Leta genyen pou li reprann kontwòl kèk aks estratejik epi garanti lib sikilasyon popilasyon an sou teritwa li. Kesyon profesè a soulve a se: si otorite yo pa kapab garanti sekirite ak sikilasyon nan zòn ki esansyèl yo, kijan yo pral rive deplwaye materyèl elektoral, ouvri sant vòt, pwoteje kandida ak pèsonèl elektoral, epi pèmèt sitwayen yo vote san presyon? Se yon kesyon ki pa janm sispann poze nan emisyon nou yo, ke nou panse ki yon kestyon lejitim. Men, reprann kontwòl Matisan pa ta sifi poukont li pou garanti bon jan eleksyon. Yon pwosesis elektoral kredib mande sekirite nan tout zòn ki konsène yo, lis elektoral serye, sant vòt aksesib, finansman, obsèvasyon endepandan ak libète patisipasyon. ## Yon reyalite pouvwa a rekonèt tou Nan mwa me 2026, Premye Minis Fils-Aimé te rekonèt kondisyon sekirite yo pa t reyini pou eleksyon fèt nan mwa out. Apre sa, Konsèy Elektoral Pwovizwa a te fikse premye tou eleksyon prezidansyèl ak lejislatif yo pou 13 desanm 2026, pandan reyalizasyon kalandriye a toujou depann de amelyorasyon sekirite ak disponibilite finansman. *Reuters* Se poutèt sa deklarasyon profesè Berg P. Hyacinthe lan antre nan yon deba ki deja egziste: èske Leta genyen kapasite reyèl pou òganize eleksyon lib, enklizif ak kredib nan kondisyon aktyèl yo? ## Ki sans ekspresyon « antèman an a katrè » a? Nan kontèks deklarasyon an, ekspresyon « pare kou pa pare, antèman an a katrè » dwe konprann kòm yon metafò popilè ki mete aksan sou ijans, delè ak obligasyon pou aji. Li pa dwe prezante kòm yon menas fizik kont Premye Minis la oswa kont okenn lòt moun. Sans politik li kapab genyen an se sa: tan an pa dwe kontinye pase san rezilta, epi tranzisyon an pa kapab dire san limit. AlainShow pa atribiye okenn entansyon vyolan ak Berg P. Hyacinthe. San yon lòt deklarasyon klè ki ta pwouve sa, li pa ta responsab pou yon medya transfòme yon ekspresyon senbolik an menas. ## Pozisyon AlainShow Responsabilite yon medya se analize pawòl piblik yo san li pa defòme entansyon moun ki fè deklarasyon an. > Nou ka toujou fè erè men nou pap janm bèt pake nou gen bon tandè! Mesaj Berg P. Hyacinthe lan dwe resevwa kòm yon apèl pou responsablite, rezilta ak transparans. Li pa nesesèman yon atak pèsonèl kont Alix Didier Fils-Aimé, men yon kestyon sou kapasite pouvwa a pou li akonpli misyon li. Gouvènman an dwe prezante yon plan sekirite ak elektoral ki mezirab : ki zòn li prevwa sekirize, ki delè li fikse, ki mwayen li genyen epi ki kondisyon minimòm ki dwe reyini pou eleksyon yo fèt san mete lavi sitwayen yo an danje plis ke sa li deja paka rezoud yo. AlainShow konkli: eleksyon san sekirite kapab pèdi kredibilite li; men yon tranzisyon san delè ak san obligasyon rann kont kapab pèdi lejitimite li tou. Se atravè rezilta, transparans ak respè prensip demokratik yo pouvwa a dwe reponn kestyon sitwayen yo. AlainShow nou se Solèy deba!

Sekirite ak eleksyon: Berg P. Hyacinthe ap poze kestyon sou kapasite Leta Ayisyen

Abòne pou resevwa nouvèl verifye

Resevwa nouvèl AlainShow yo

Kòmantè